සමාජ හෘද සාක්‍ෂියට කෙරෙන ඇමතුම
| ආචාර්ය සුජිත් නිශාන්ත හේවගේ
නූතන යුගයේ උදාවී ඇති ඇතැම් තත්ත්වයන් නිසා මිනිසුන්ට බොහෝ පීඩාවිඳීමට සිදු වී තිබේ. මෙයට බොහෝ හේතු තිබිය හැක. සමාජ ආර්ථික පසුබිම මේ සිදුවීම පිටුපස ප්‍රබලව ඇත. කලාව, සෞන්දර්ය රසවින්දනාත්මක ශක්‌තිය මිනිස්‌ සිත් සතන් තුළින් ඉවත් වෑයම නිසා මිනිස්‌ සිත් රළු වී තිබේ. දැඩි ආත්මාර්ථකාමීත්වය මේ රළු සිත්වල දක්‌නට ලැබෙන එක්‌ ලක්‍ෂණයකි. මිනිස්‌ සිත් රළුවීම නිසා අද මිනිසුන් බොහෝ විට අනුන්ගේ දුකේදී සංවේදී නොවන බව පෙනෙන්ටද තිබේ. මේ හේතුව නිසාම නූතන කඨෝර සමාජ පරිසරය තුළ ස්‌ත්‍රිය විවිධ අපහසුකම් හා දුෂ්කරතාවලට බඳුන් වනු දැකිය හැක. එසේම එබඳු අවස්‌ථාවලදී සමාජයෙන් ඇයට නිසි පිළිසරණක්‌ නොමැති අවස්‌ථාද තිබේ. පුරාණ සමාජයේදී මාතෘත්වය කේන්ද්‍රකරගත් සමාජ පසු බිම තුළ ස්‌ත්‍රියකට ආරක්‍ෂාවක්‌ සැලසුණු අතර ඇය කෙරෙහි ගෞරවයක්‌ද සමාජයේ පැවතිණි. විවෘත ආර්ථිකයේ දැඩි අයෝමය හස්‌තය තුළ සමාජ ආර්ථික, දේශපාලනික පසුබිම ගුලිව හිරවීමත් සමග ම එදා පැවති ඒ සමාජ පසුබිම වේගයෙන් වෙනස්‌ව ගොස්‌ තිබේ. මේ හේතුව නිසා වර්තමානයේ ස්‌ත්‍රිය දෙස සමාජ ඇස යොමුව ඇත්තේ එදා පැවති තත්ත්වයෙන් බොහෝ දුර ඈතය. මීට නූතන සමාජ වාණිජ අර්ථක්‍රමය බොහෝ දුරට වගකිව යුතුය. මන්ද කාමය ප්‍රධාන තේමාව කොටගෙන ස්‌ත්‍රිත්වය අලෙවි කර මුදල් සෙවීම එකම පරමාර්ථය කරගනිමින් කටයුතු කිරීම නිසා අවධානය යොමු වී ඇත්තේ ඇගේ මාතෘත්වයේ ගුණ සුවඳ ස්‌පර්ශ කිරීමට නොවේ. ස්‌ත්‍රියකගේ නග්න සිරුරේ කාමශක්‌ත වූ හැඩතල සෙවීමටය. මිනිස්‌ සිත් සතන් තුළ වාණිජ අර්ථක්‍රමය මගින් අවුලවා ඇති කාමයේ වියරු අග්නි ජාලා වේගවත්ව ඇවිලී යනු පෙනෙන්නට තිබේ. මෙරට තුළ විවිධ ස්‌ථානවලින් වාර්තාවන ස්‌ත්‍රිය කේන්ද්‍රකරගත් අපරාධ රැලි බිහිවීමට හේතුව එබඳුය.
මෙරට ස්‌ත්‍රිය පිළිබඳ සමාජ විද්‍යාත්මක පර්යේෂණ අධ්‍යයන ප්‍රමාණවත් තරම් සිදු නොවීමද සමාජයට නිසිසේ ඇය අවබෝධ කර ගැනීමට අපහසුවකි. මෙරටට සාපේක්‍ෂව විදේශවල ස්‌ත්‍රී ශ්‍රමය පිළිබඳ නිසියාකාරව අධ්‍යයනයන්හි නිරත වී ලබා ඇති පර්යේෂණාත්මක අධ්‍යයනයන්හි ප්‍රතිඵල නිසා ඇයට හිsමි සමාජ ඇගයුම් එරටවලදී තහවුරුව තිබේ. ඒ තත්ත්වය මෙරට තුළ තවම නිසි ලෙස දැකගත නොහැක. නමුදු මෙරට ස්‌ත්‍රීන් පිළිබඳ කටයුතු කරන රාජ්‍ය නොවන සංවිධාන රැසක්‌ තිබේ. ඒවාට පිටරටවලින් විවිධ ආධාර, ප්‍රතිපාදනද ලැබේ. එබඳු කටයුතුවල නිරත පිරිස්‌වල මූලික අරමුණ කුමක්‌ හෝ ව්‍යාපෘතියක්‌ දියත් කරන බව සාධක සහිතව විදේශ රටවලට පෙන්වා මෙබඳු කටයුතු සඳහා පිරිනැමෙන ප්‍රතිපාදන, විදේaශ ශිෂ්‍යත්ව, විදේශ සංචාර ලබා ගැනීම මිස මෙරට අසරණ ස්‌ත්‍රීන් පිළිබඳව අවංක ආකල්පයකින් කටයුතු කිරීම නොවේ. මේ නිසා මෙරට අසරණ ස්‌ත්‍රීන්ට සිදුව ඇත්තේ බොහෝ පැතිවලින් පීඩාවට ලක්‌වීමටය. එක්‌ පැත්තකින් පුරුෂාධිපත්‍යය නමැති අයෝමය හස්‌තයෙන් පීඩාවට පත්වෙද්දී අනෙක්‌ පසින් ඇගේ ගැලවීම පිණිස ඉදිරිපත් වන පිරිස්‌ ඇය වෙනුවෙන් රාජ්‍ය නොවන සංවිධාන හරහා මෙරටට එවන විදේශීය ප්‍රතිපාදන ගසාකෑමට මානබලති. අවසානයේ ස්‌ත්‍රියට සිදු වනුයේ ඒ දෙපක්‍ෂයේ අසාධාරණ ක්‍රියාවන්ට බිලිවී නිහඬවම ඒවා ඉවසීමටය. කිසිවකු ඇය පිළිබඳ අවංකවම ක්‍රියා නොකරති.
ස්‌ත්‍රියට හිමි දුක්‌ සෝ සුසුම් හා අසාධාරණකම්
ස්‌ත්‍රිය බහුලව නියෑළී සිටින ඇඟලුම් කර්මාන්තශාලා ආශ්‍රිත රැකියාවලින් මෙන්ම විදේශගත සේවයේ නිරත වීම මගින් උපයන ධනය දළ ජාතික නිෂ්පාදනයට එක්‌වෙද්දී ඇය සූරාකෑමට බඳුන්වන අවස්‌ථා බහුල වී තිබේ. මීට විවිධ හේතු පැවතිය හැක. එම හේතු නිසියාකාරව හඳුනාගෙන ඒවාට විසඳුම් සැපයීමට උත්සාහදැරීම පාලක පිරිස්‌වල යුතුකම ලෙස සැලකිය හැක. යමක්‌ සිදුවූවාට පසුව වන්දි ලබාදෙනවාට වඩා එබඳු සිදුවීම් ඇතිවීමට පෙර වළක්‌වා ගැනීමට කටයුතු පිළියෙල කිරීම වැදගත්ය. අද මෙරට බොහෝ විට සිදු වනුයේ යමක්‌ සිදු වූ විට වන්දි ලබා දෙන ක්‍රමවේදයකි. බොහෝ විට දී මේ වන්දි සැබවින්ම හිංසනයට, කරදරයට, අතවරයට ලක්‌ වූ ස්‌ත්‍රියට ලැබෙනවා දැයි යන්න වෙනම සාකච්ඡා කළ යුතු වූ කරුණකි. ස්‌ත්‍රිය සූරා කෑමට පරිබාහිරව ඇයට සිදුවන, අයුතු අසාධාරණකම්, අතවර ආදිය උධෘතකොට දක්‌වා එබඳු දේට ලැබෙන මූල්‍යමය ආධාර හෝ වෙනත් ප්‍රතිලාභ ඇගේ අතට නොයා අදෘශ්‍යමාන හස්‌තවලින් අතුරුදන්වීමට ඉඩ ඇති අවස්‌ථා බොහෝ ය. යම් යම් සිදු වීම් පිටුපස සිටින විවිධ පුද්ගලයන් හා කණ්‌ඩායම්වල බලලෝභී, දැඩි ආත්මාර්ථකාමීවූ ගති ලක්‍ෂණ නිසා වැඩිපුරම පීඩා විඳීමට සිදු වී ඇත්තේද ශ්‍රමවෙළඳ පොළ තුළ අන්ත අසරණ වන මෙරට වැඩ කරන ස්‌ත්‍රීයටය. වෙනත් අය සියලු වරප්‍රසාද, හිමිකම් සියල්ල තනිව භුක්‌ති විඳිද්දී ඇයට සිදු වී ඇත්තේ ස්‌ත්‍රිත්වයට එරෙහිව නැඟෙන මේ සියලු පාපකාරී සිදුවීම්, අවලාද දුක්‌ සෝසුසුම් කඳුළු පිරුණු දෑසින් නිහඬ මුවින් යුතුව උපේක්‌ෂකව තනිව විඳදරා ගනිමින් මුළුලොවට හොරා යටිසිතින් හඬා වැටීමටය. දුගී දුප්පත්කම මැද වුවද ස්‌ත්‍රියකට ඇගේ පිවිතුරු බව උතුම්ය. බොහෝ විට සිදු වනුයේ ඇගේ ගත ලේ, කඳුළු දහදිය පමණක්‌ ශ්‍රමය ලෙස පූජා කිරීමට නොවේ. ඇය දිවිහිමියෙන් පණනල මෙන් රැක ගත් පවිත්‍ර බවද ඒ සියල්ල සමග කැපකිරීමටද අනේකවිධ අවස්‌ථාවලදී බලහත්කාරයෙන් ඇය යොමු කරවා ගනු ලැබේ.
රැකියාව, ජීවන මාර්ගය රැක ගැනීමට ස්‌ත්‍රියකට ඇතැම් අවස්‌ථාවලදී ඇයගේ පවිත්‍ර බව බිලි ගැනීමට මාන බලන්නා වූ බියකරු රුදු මෘග රකුසන්ට අවනත වීමට සිදු විය හැක. එබඳු අවස්‌ථාවලදී ඇගේ ගත වැකි ලේ දහදිය, කඳුළු පමණක්‌ නොව ආත්මය පවා සූරා කෑමට ඉඩ ලබා දී නිසලව අඩපණ වීමට සිදුව ඇත්තේ සමාජ ක්‍රමය එබඳු දේවලට ඇයට එරෙහි වීමට පවා අවස්‌ථාව අහිමි කර ඇති හෙයිනි. ඇතැම් විට නීතිය, සාධාරණත්වය පවා ධනය, බලය, සමාජ තත්ත්වය ඇති අය ඉදිරියේදී වාසි පැත්තට පක්‍ෂපාතී වන අවස්‌ථාවන්ද එළැඹේ. වරක්‌ පිරිමියකු ඉදිරියේ අසරණව ආත්මය බිලිදුන් යුවතියකට යළිදු සිය දහස්‌ වරක්‌ සමාජ ඉදිරියේ ආත්මය පාවාදීමට කටයුතු සලස්‌වන තැනට මේ සමාජ ක්‍රමය සකස්‌ව ඇත. මේ නිසා තමාට සිදු වූ කවර නම් ප්‍රබල අසාධාරණය, අයුක්‌තිය, අතවරය ඉදිරියේ වුවද මුනිවත රැකීමට අද යුවතියෝ පෙළඹී සිටිති. එබඳු අවස්‌ථාවකට පත්වන වෙනත් යුවතියකට එවැනි ක්‍රියා කලාප බාධාකාරී වන බව සත්‍යයකි. නමුදු ඇයට වෙන කළ හැකි අන් යමක්‌ද මේ සමාජ ක්‍රමය තුළ වෙත ඉතිරිව නැත. මේ දැඩිව පුරුෂාධිපත්‍යය රජ කරන සමාජ ක්‍රමයකි. මේ සමාජ ක්‍රමය තහවුරු කිරීමට මිස, සාධාරණත්වය ලබාදීමට සමාජ ආකල්ප සකස්‌ කරන අයද මේ සමාජයේ දක්‌නට නැත. ස්‌ත්‍රීන් ගැන බහුලව සාකච්ඡා කරන අයද එසේ කරනුයේ රාජ්‍ය නොවන සංවිධාන හරහා ලැබෙන යූරෝ, ඩොලර් මලුවලට කෑදරකම නිසා මිස අවංක වුවමනාව නිසා නොවේ. එනිසා එබඳු අයගෙන් පිහිට පැතීම ඉබ්බන්ගෙන් පිහාටු ඉල්ලීමේ ව්‍යර්ථ වෑයම හා සමාන වනු ඇත. බොහෝ අය අද සිරිතක්‌ වශයෙන් කරනුයේ ස්‌ත්‍රියගේ සමාජ සුරක්‍ෂිත බව පිළිබඳ සාකච්ඡා කිරීමයි. ඒ ක්‍රියාදාමයේ අවංකත්වය පිළිබඳ බොහෝ ගැටලු ඇත. මන්ද ස්‌ත්‍රියකට මුහුණ පෑමට සිදුවන විවිධ අසීරුතා, අතවර පිළිබඳ සංවේදී බවත් මෙබඳු අය තුළ සැබවින්ම පවතින්නේ දැයි යන්නයි. සීත කාමරවල වෙසෙමින්, වායු සමනය කළ රථ වාහනවල ගමන් බිමන් යමින්, ශාරීරික කෘත්‍ය සඳහා වැසිකිළි, කැසිකිළි පරිහරණය කරන්නාක්‌ මෙන් නිරතුරු විදේශ සංචාරය කරමින්, සුවපහසු දේශන ශාලාවල දේශන පවත්වමින් ඒ සඳහා වෙන්ව ඇති ප්‍රතිපාදන ගිල දමමින් අධි සුඛෝපභෝගී ජීවිත ගත කරන සමහරු සිය ව්‍යාජ ක්‍රියා කලාපය තුළින් පිටතට පෙන්වන්නේ සැබෑවක්‌ නොවන බව වටහා ගත යුතුය.
විදේශ ශ්‍රමය ම්ලේච්ඡ දඬුවම් හා මානසික අවශ්‍යතා
විදේශගතව මව්බිම වෙනුවෙන් ලේ දහදිය කඳුළු වගුරුවා ශ්‍රමය කැප කරන අසරණ ස්‌ත්‍රීන් වෙනුවෙන් දක්‌වන්නා වූ සැලකිල්ල ඔවුන් මෙරටට ලබා දෙන විදේශ විනිමය කෙරෙහි යොමු කරන අවධානයට වඩා ඉතාම අඩුය. විදේශයන්හිදී විවිධ කරදර, අතවර, අපයෝජනයන්ට ලක්‌වීම සාමාන්‍යකරණය වීම මෙරට ස්‌ත්‍රීත්වයට කරනු ලැබූ විශාල අවමානයකි.
ඇතැම් ස්‌ත්‍රීන් විදේශයන්හිදී ඇය අතින් සිදුවන සුළු අත්වැරැදීමකදී පවා සිය ජීවිතයෙන් ඒ සඳහා වන්දි ගෙවීමට පවා සිදුව තිබීම කෙරෙහි තවමත් බලධාරීන්ගේ නිසි අවධානය යොමු නොවීම අවාසනාවන්ත තත්ත්වයකි. මුළු ලොවම මානව හිමිකම් පිළිබඳ දැඩි අවධානය යොමු කරද්දී, නීතිරීති ව්‍යවස්‌ථා පැනවීමේදී මිනිස්‌ ජීවිතයේ අගය රැකීමට කටයුතු කරද්දී ඒ කිසිත් නොසලකා තවමත් ඇතැම් රටවල් ම්ලේච්ඡ නීතිරීති මතම පිහිටා කටයුතු කිරීම විශේෂයෙන් විදේශගත ස්‌ත්‍රීන්ට හානිකර වී තිබේ.
ඉතා අසීරුවෙන් රැකීරක්‍ෂාවක්‌ සොයාගෙන ගත වැකි දහදිය, ලේ කඳුළු කැපකර ශ්‍රමය ලෙස පුදා ඉන් උපයන සොච්චම් මුදලින් දහසකුත් එකක්‌ යුතුකම්, වගකීම් ඉටු කොට අරපරිස්‌සමින් එකතු කරගන්නා මූල්‍ය සරිය විවාහ ජීවිතයට ඇතුළත්ව තම අසරණ දෙමව්පියන්ගේ සෙසු බලාපොරොත්තු ඉටු කිරීමට ඇය වෙහෙසවන්නීය. මේ සඳහා ඇතැම් විට කෙතරම් වෙහෙස වුවද ඒ බලාපොරොත්තු සියල්ලම ඇයට ඉටු කරගත නොහැකි වීමට ඉඩ තිබේ. මන්ද සමාජ ක්‍රමය නිසා මෙරට ස්‌ත්‍රිත්වය පත්ව ඇති ඉතා අවාසනාවන්ත ඉරණම යුගයේ අභියෝගයට පාත්‍රව ඇති දැඩිම ෙ€දවාචකය බව පෙන්වා දිය හැක. මේ මහත් බලාපොරොත්තු රැස ඉටු කර ගැනීමට වෙහෙසගන්නා අතර වාරයේදී ඇය අනන්ත අප්‍රමාණ රැවටීම්වලට ලක්‌ විය හැක. කෙතරම් උසස්‌ සමාජ මට්‌ටමක වැජඹුණද ස්‌ත්‍රිත්වය අසරණ වන අවස්‌ථා පහසුවෙන් එළැඹිය හැකි බව අමතක නොකළ යුතුය. ඉතා දිළිඳු අන්ත අසරණ ස්‌ත්‍රීන්ට සේම කිසිදු අගහිඟයක්‌ නැතිසේ පිටතට පෙනෙන ඉසුරුමත් වූ ජීවිත ගත කරන ස්‌ත්‍රීන්ට ද කිසියම් කෙනකුගේ ආදරයක්‌, රැකවරණයක්‌, ආරක්‍ෂාවක්‌ කායිකව නැතත් මානසිකව හෝ අවශ්‍යමය. එය ස්‌ත්‍රිය පිරිමියාට වඩා කායිකව දුබලය යන මතය තහවුරු කිරීම පිණිස ඉදිරිපත් කරන අදහසක්‌ නොවන බව පළමුවෙන්ම පැවසිය යුතුය. කෙතරම් ශක්‌තිමත් පිරිමියකුට වුවද මුදල්, බලය, සමාජ තත්ත්වය මගින් පමණක්‌ සපුරාගත නොහැකි ආදරය, පිළිගැනීම, සෙනෙහස වැනි සංවේදී මානසික අවශ්‍යතා ඇති වේ. ස්‌ත්‍රියකට ද ඒ තත්ත්වය එසේම පොදුය. හුදෙක්‌ තමාගේ ප්‍රතිවිරුද්ධ ලිංගිකයකු වෙතින් ලැබෙන ආදරය, සෙනෙහස, පිළිගැනීම වැනි මානසික අවශ්‍යතා සියලු දෙනා විෂයෙහි පොදුය. ස්‌ත්‍රීහු මාතෘත්වය දැරීමට සුදුසු මානසික පසුබිමක්‌ උපතින් ජීව විද්‍යාත්මකව උරුමකර ගෙන පැමිණෙන්නෝය. එබැවින් ඇයගේ මානසික පසුබිම පිරිමියකුට වඩා මෘදුබවට, ආදරයට, සෙනෙහසට සංවේදීය. එනිසා කෙතරම් මුදල්, බලය, සමාජ තත්ත්වය තිබුණද ඒ සියලු දේ සතු වූ ස්‌ත්‍රීන් හට ඒ කිසිවක්‌ නොමැති ස්‌ත්‍රියකට වඩා මානසික පසුබිම තුළ ඇයට නිසර්ගයෙන් හිමිවිය යුතු පිළිගැනීම, සෙනෙහස දැඩිව අවශ්‍ය විය හැකි අවස්‌ථාද ඇතැම්විටදී ඇති වේ.
ආචීර්ණ කල්පිත බමුණු මතවාද හා සාවද්‍ය සමාජ ඇගයුම්
බොහෝ විට ස්‌ත්‍රීන් නොමඟට යොමු වනවා යෑයි ඇය දෙස වැරැදි ඇසකින් බැලීමට හේතුව ස්‌ත්‍රියකගේ මෙබඳු වූ කායික, මානසික අවශ්‍යතා මානව සමාජය විසින් නිසියාකාරව හඳුනා නොගැනීමයි. විවාහක, අවිවාහක බව නීතිමය රාමුව තුළ රැඳී ඇති දෙයකි. ඊට හුදෙක්‌ විවාහ දිවියේ ගැබ්ව පවතින සාමාන්‍ය ජීවවිද්‍යාත්මක කායික අවශ්‍යතාවලට අමතරව ආදරය, සෙනෙහස, රැකවරණය, පිළිගැනීම වැනි මානසික අවශ්‍යතාද එක්‌වීම අවශ්‍යමය. එසේ නොමැති අවස්‌ථාවලදී ඒ කරුණු ලැබෙන වෙනත් පාර්ශ්ව වෙත සිත නතුවීම හුදෙක්‌ ස්‌ත්‍රියගේ වගකීම් රහිත ක්‍රියා කලාපය යෑයි ලඝූකර දක්‌වමින් සමාජය ඉදිරියේ ඇයව අවතක්‌සේරු කිරීමට එය හේතුවක්‌ කර නොගත යුතුය. එය ස්‌ත්‍රියකටම පමණක්‌ අනන්‍ය වූ දෙයක්‌ නොවේ. පිරිමියකු වුවද එබඳු අවස්‌ථා සඳහා යොමු විය හැක. පිරිමියකු එබඳු අවස්‌ථා සඳහා යොමු වීම පිsරිමිකමට නිසි සමාජ ඇගයුමක්‌ ලෙස සලකන සමාජයකදී ස්‌ත්‍රියකට ඒ සඳහා හිsමි සමාජ අවමානය වඩාත් තහවුරු වී තිබේ. ස්‌ත්‍රී බව තුළ නිබඳව චපලත්වය දකින බමුණු සමාජය මේ වන විට බිඳ වැටී ඇතත්, එදා තිබූ බමුණු ආකල්පවලින් මනස ඔද්දල් කරගත් අය දියුණු යෑයි පවසන මේ නූතන සමාජයේදී පවා බහුලව දැකිය හැක. අද සිටින්නේද පූන නූල නොපළඳින බමුණන්ය. ස්‌ත්‍රී, පුරුෂ ලිsංගික අනන්‍යතාව ජීව විද්‍යාත්මකව සත්‍යයකි. එසේ වුවද සමාජ වරප්‍රසාද භුක්‌ති විඳීමේදී එය ස්‌ත්‍රියට එරෙහිව අවියක්‌ කර නොගැනීම වඩා වැදගත්ය. එකම සමාජ මට්‌ටමේ වෙසෙන, එකම සමාජයීය වරප්‍රසාද හිමිව ඇති ස්‌ත්‍රී, පුරුෂ දෙපක්‍ෂයට ඒවා රිසිසේ භුක්‌ති විඳීමට සමාජය සමාන පසුබිමක්‌ සකසා නැති බව කනගාටුවෙන් වුවද පැවසිය යුතුය. මේ සමාජ පසුබිම ස්‌ත්‍රියකගේ සමාජ මට්‌ටම පිළිගෙන ඇත්තේ හුදෙක්‌ මතුපිට ස්‌ථරය තුළ බාහිරව පමණක්‌ පෙනුමට බව ඉන් හෙළි වේ. එයද පිරිමින්ගේ සමාජ සාධාරණත්වය පිළිබඳ තහවුරු කිරීමට ඇති එක්‌තරා සමාජ ලකුණක්‌ වශයෙන් පමණකි.
පිරිමීහු මතුපිටින් කිසිදු වෙනසක්‌ නොපෙන්වුවද යටිසිතින් තමාගේ සමාජ මට්‌ටමට සැසඳෙන පරිදි ස්‌ත්‍රීන්ගේ සමාජ මට්‌ටම උසස්‌ වනු නොරිසි වෙති. තමාගේ සමාජ මට්‌ටමට වඩා අඩු සමාජ මට්‌ටමක්‌ ඇති ස්‌ත්‍රීන්ට අනුකම්පාවක්‌ දැක්‌වීමට පෙළඹුණද, ඉන් ඉහළ සමාජය වෙත අතික්‍රමණය වීම ඔවුහු නොඉවසති. මේ හේතුව නිසා උසස්‌ සමාජ මට්‌ටම්වල වෙසෙන ස්‌ත්‍රීන්ට තමන්ට සැසඳෙන සමාජ මට්‌ටම්වල පසුවන පිරිමින්ගෙන් ලැබිය යුතු සහාය, පිළිගැනීම, සෙනෙහස ආදී මානසික අවශ්‍යතා බලාපොරොත්තු වූ පරිදි නොලැබිය හැක. ඇතැම් විට සිය විවාහ සහකරුද එබඳු සමාජ මට්‌ටම්වල පසුවන පුරුෂ පක්‍ෂයට අයත් විය හැක. එබඳු අවස්‌ථාවලදී ස්‌ත්‍රීන් පත්වන බලවත් අපහසුතාව අමුතුවෙන් පැහැදිලි කළ යුතු නැත. එබඳු පිරිමි ස්‌ත්‍රියක යනු කායික, මානසික අවශ්‍යතා ඇති සාමාන්‍ය මනුෂ්‍යයකු බව පවා අමතක කර දමනුයේ කිසි යුතුකමක්‌ හෝ වගකීමක්‌ ඇති විලස නොවේ. මනුෂ්‍යයකු වූ ස්‌ත්‍රියකටද කායික, මානසික අවශ්‍යතා පොදුය. යම්තැනක්‌ තමා අපේක්‍ෂා කළ කායික, මානසික තෘප්තිය නොමැති වූ විට එය ලැබෙන අන් තැනකින් එය සපුරා ගැනීමට යුහුසුළුවීම පුදුමයක්‌ද නොවේ. ඇතැම් අවස්‌ථාවලදී නොඉල්ලාම වුවද එබඳු දේ ලැබිය හැකි අවස්‌ථා උදාවිය හැක. එය නීති ප්‍රතිපාදන වලින් පරිබාහිර වූවක්‌ද විය හැක. නීතිය පවා සකස්‌ව ඇත්තේ මනුෂ්‍යයාගේ සුවපහසුව එමගින් සැලසෙන බැවිනි. එයින් අපේක්‍ෂා කළ දේ නොලැබෙන විට ලැබෙන තැනකින් ලබා ගැනීමට පෙළඹීම මනුෂ්‍යත්වයේ පොදු දුබලතාවක්‌ මිසක ස්‌ත්‍රිත්වයටම පමණක්‌ ආවේණික සහජ දුබලතාවක්‌ ලෙස සැලකීම වැරැදිය. ඇතැම් අවස්‌ථාවලදී තමාට වඩා පහළ සමාජ මට්‌ටමක සිටින පිරිමියකුගෙන් වුවද යම්කිසි ස්‌ත්‍රියකට අවශ්‍ය කායික, මානසික අවශ්‍යතා සම්පූර්ණවීම සිදුවිය හැක. ඒ සියලු දේ හුදෙක්‌ ස්‌ත්‍රියකගේ කාමුක බව නිසා හෝ චපලබව නිසා සිදුවන වැරැදි ලෙස හුවා දැක්‌වීම ඇයට සිදු කරන දැඩි අසාධාරණයක්‌ ලෙස සැලකිය හැක. මන්ද කුමන අවස්‌ථාවකදීවත් සමාජය පිරිමියා දෙස වැරැදි ඇසකින් නොබලා එකී සියලු වැරැදි ස්‌ත්‍රිත්වය මතට පමණක්‌ ආරෝපණය කිරීමට සැදී පැහැදී සිටින බැවිනි. නමුදු සිහිතබා ගත යුතු වැදගත්ම කරුණ නම් තනි අතකින් පමණක්‌ අත්පොළසන් දිය නොහැකි බවයි. එනිසා සැමවිට ස්‌ත්‍රීන්ටම දොස්‌ නැඟêම ඉතා වැරැදිය.
Post a Comment