කතකගේ ආයාචනයෙන් වල් අලියා මෙල්ල වෙයි

"අනේ මගේ දරුවන්ට කෑමට ඇති වී ටික උඹ කෑවොත් අපිට බඩගින්නේ මැරෙන්නයි වෙන්නේ" කියා ගෙවිලියක (ඩී. එම්. සීලවතී 45) අඬමින් කාරුණිකව පැවසූ වදන් ඇසීමෙන් පසු පැහැරගත් වී ගෝනි එම ස්‌ථානයේම අතහැර දමාගිය වල් අලියකුගේ පුවතක්‌ ගිරාඳුරුකෝට්‌ටේ රොටලවෙල ගම්මානයෙන් වාර්තා වේ.

මෙම සිද්ධියට මුහුණ පා ඇත්තේ දිවුල්පැලැස්‌ස රොටලවෙල අංක 1/43 හි පදිංචි දරුවන් සිව් දෙනකු සිටින ගොවි පවුලක්‌ය. ඉකුත්දා මධ්‍යම රාත්‍රියේ මොවුන් සියලු දෙනා සුවසේ නිදා සිටියදී ශබ්දයක්‌ ඇසී බලනවිට දැවැන්ත වල් අලියකු ජනේලයෙන් වී ගෝනි අදිමින් සිට ඇත.

ඒ මොහොතේ ගෙහිමි කාන්තාව කරුණාවෙන් කී වදන් ඇසීමෙන් පසු රැගෙන යැමට ගත් වී ගෝනි මිදුලෙහි දමා නිවැසියන්ට, නිවසට හෝ ගෙවත්තේ කිසිදු වගාවකට හානි නොකර අලියා අඳුරේම කැළෑව දෙසට ගොස්‌ තිබේ. නිරතුරුව වල් අලි උවදුරට ලක්‌ වන මෙම රොටලවෙල ගම්මානයේදී මීට දින කිහිපයකට පෙර වල් අලියකු පහරදීමෙන් තිලකරත්න නැමති ගොවි මහතකු ද ජීවිතක්‍ෂයට ද පත්විය.