මේධානන්ද හිමියන්ට දහම් පාසල් යන්න ලැබුනානම් මෙහෙම අලකලංචියක් වෙන්නේ නැත!

එල්ලාවල මේධානන්ද හිමියන්ට හෙළ උරුමයේ නායකත්වය අහිමි වෙලා ය. පුරා විද්‍යා චක්‍රවර්තීට ඉතිහාසයේ කුණු බාල්දියට නොවැටී සිටින්නට නම් හෙළ උරුමයට වඩා හයිය අත්තක් දැන් අල්ලා ගත යුතුව තිබේ. එහෙම අතු නැතුවා නොවේ.

එතුමා අප කීවත් නැතත් එහෙම අත්තක දැන් එල්ලෙනු ඇත්තේ ය. තමන් වෙනත් පක්ෂයකට සම්බන්ධවීමට හෝ තමන්ගේම පක්ෂයක් ගොඩනැගීමට හෝ කටයුතු කරන්නට බලාපොරොත්තුවන බව එතුමා දැනටමත් කියා ඇත.

ඉදින් ඒ අත්තට ගොඩ නැගීමට හෙළ උරුමයේ තවත් අය ඉදිරිපත් වේ නම් ජාතික නිදහස් පෙරමුණ මෙන්ම ජාතික හෙළ උරුමයක් හදා ගෙන පැරණි විදිහට නායකකම් කිරීමේ හැකියාව එතුමාට නැතිවා නොවේ. ඒ සදහා ඇත්තේ ලංකාවේ තවත් එවැනිම‍ දේශප්‍රේමීයෙක් වූ විමල්වීරවංශ ගිය පාරේ යාම ය.

එහෙම වුනොත් මහින්ද රාජපක්ෂ රජතුමාට තමන් නිසා බිදී නොගිය එකදු පක්ෂයකුදු නැතැයි වගාඩම්බර කියන්නට පුලුවන.

ඇත්තටම එහෙම කළාවුවත් ජනතා විමුක්ති පෙරමුණට ‍මෙන් මහින්දගෙන් පලි ගන්නට හෙළ උරුමයට බැරි ය. ඒ නිසා දිව විකාගෙන උන් මහින්දත් සමගම හිටිනු ඇත්තේ ය. හරියට තමන්ගේ නායකත්වයට පිටුපාමින් ආණ්ඩුව සමග එක්වූ නන්දන ගුණතිලකයන් ආණ්ඩුව බාරගත් පසුවත් දිව විකාගෙන ආණ්ඩුව සමග කල්ගෙවන විමල් වීරවංශ පරිද්දෙනි.

එකිනෙකා සමග කුලල් කා ගන්නේ නැතිව ඉන්න බැරි අමාරුවක් දේශප්‍රේමීන්ට තිබේ. එල්ලාවල මේධානන්ද සිද්ධියෙන් ද නැවත වරක් පෙන්නුම් කරන්නේ ඒ අමාරුව එන්න එන්නම අසාධ්‍යවන බව ය.

මේ එක් පැත්තකින් රංගෙ බණ්ඩාරලාට ද රජතුමා ශක්තිමත් කිරීමට හිත යෙදී තියෙන පසුබිමක ය.

ඒ එකතු වෙන විදිහට මේ මැට්ටන්ට ඕන දෙබරයක් හෝ දබරයක් කියා යූ ඇන්පී එකේ ටීම් එකකින්ම රට පාලනය කරන්නට මහින්ද කල්පනා කරනු ඇත්තේ ය. දැනටම කියා එහෙම ලොකු වෙනසකුත් නැත්තේ ය.

මේධානන්ද හාමුදුරුවන් දහම් පාසල් ගියා නම් මෙහෙම ප්‍රශ්න එන්නේ නැත. මට හිතෙන්නේ ඒ දවස්වල ඉරිදා ටියුෂන් තිබුණු නිසා දහම් පාසල් යන්නට එතුමාට බැරිවෙන්නට ඇත.

ඉදිරි ලංකාවේ දේශප්‍රේමීන්ට නම් මෙසේ කුලල් කා ගන්නේ නැතිව ඉන්නට පුලුවන් වනු ඇත. ඒ දැන් ලද අවසරයෙන් දහම් පාසල්වලට යන සෙනග වැඩිවී ඇති නිසා ය.