ලුසී අක්කා සහ හිරුණිකා

l අමිල ගුණරත්න

ලුසී අක්කා ගේ මිනිහා වැඩ කලේ උළු මෝලේය. උළු මෝලේ මුදලාලි සේවකයන්ට හරිහැටි ගෙව්වේ නැත. සේවකයන්ගෙන් වැඩ ගත්තේ සැලකුවේ වහලුන්ට වගේය. උළු මෝලේ අනාරක්ෂිත විදුලි කාන්දුවිමකින් ලුසී අක්කා ගේ මිනිහාට කරන්ට් වැදී ඔහු මළේය. සේවකයෝ මේ ගැන උද්ඝෝෂණය කළහ. ලුසී අක්කා ද සේවකයන් සමග හරි හරියට උද්ඝෝෂණය කරමින් මියගිය සැමියාට වන්දියක් දෙන ලෙස කීවාය. නමුත් ලැබුණු වන්දියක් නැත. ලුසී අක්කා නඩු යන බව පැවසුවාය. නමුත් දාපු නඩුවක් නැත. ටික කාලයක් යන විට උළු මුදලාලි ලුසී අක්කා ගේ ගෙදර නිතර ගැවසෙන්නට විය. සමහර දවස් වලට උළු මුදලාලි රාත්‍රිය ගත කලේ ලුසී අක්කා ගේ ගෙදරය. මේ ගැන උළු මෝලේ කට්ටිය ලුසී අක්කාගෙන් ඇසු විට ඇය පැවසුවේ " මැරිච්ච මිනිහා මලා ඒත් දැන් මම කාල ඇඳලා ඉන්න එපැයි " කියාය.

හිරුණිකාද ලුසී අක්කා වගේය. භාරතගේ මරණය ජාත්‍යන්තරයට ගෙන යන බව කීවාය. ලංකා අධිකරණයෙන් යුක්තිය ඉල්ලුවාය. නමුත් දැන් නිල නිවාසයට නිල වාහනයට සහ දුමින්දගේ පවුලෙන් දුන් මුදල් වලට උද්ඝෝෂණ නැවතී තිබේ. හෙට අනිද්දා දුමින්ද ලංකාවට පැමිණි විට ජනතාව අන්දන්නට රුපවාහිනී කැමරා වලට මොකක් හෝ කියනු ඇත. නමුත් සක්‍රිය උද්ඝෝෂණයක් සිදු වන්නේ නැත. තව ටික කාලයක් යන විට දුමින්ද සහ හිරුණිකා එකට අත්වැල් බැඳගෙන ඩිලාන් පෙරේරා සහ සුසන්ත පුංචිනිලමේ මෙන් එකම ආණ්ඩුවේ වැඩ කරනු ඇත. ඒ අනුව බලන විට හිරුණිකාද ලුසී අක්කා ගේ තියරිය අනුගමනය කොට තිබේ. ඒ ගැන වරදක් නැත. සමාජ සාධාරණයක් , යුක්තියක් නැති වැඩවසම් ශේෂයන් සමග විකෘති ධනවාදයක් තිබෙන ශ්‍රී ලංකාව වැනි රටක දියණියක් තමන්ගේ පියාගේ මළකුණ හෝ විකුණාගෙන කෑම පුදුමයක් නොවේ.

භාරත ලක්ෂ්මන් අහිංසක විජය කුමාරතුංග කෙනෙකු නොවේ. ඔහු මැරයෙකු විය. මිනිසුන්ගෙන් කප්පම් ගත්තේය. කප්පම් නොදුන් විට මිනිසුන්ට පහර දුන්නේය. ඉඩම් බලෙන් අල්ලාගත්තේය. පාතාලයක් රන් කලේය. නමුත් වඩාත් බලවත් හා ආණ්ඩුවේ අනුග්‍රහය තිබු මැරයා වන දුමින්දට ඔහු පරාජය විය. දැන් භාරත ලක්ෂ්මන් යනු ඉතිහාසයේ කුණුකුඩයට ගිය තවත් එක සොත්ති උපාලි කෙනෙකි. ඔහුගේ මරණය ගැන ගැන ඔහුගේම බිරිඳ හෝ දියණිය සත්‍ය හඬක් නගන්නේ නැත. ඒ නිසා හිරුණිකාලා සමග බෝඩ් ලෑලි උස්සාගෙන සිටි ජනයා අනාතය.

හිරුණිකාට තමන්ගේ අම්මාට වඩා මොලයක් තිබුණි. අම්මා නිල නිවාසයට නිල වාහනයට නිහඬ වන විට හිරුණිකා උද්ගෝෂණය දිගටම ගෙන ගියාය. උද්ගෝෂණය දිගු සහ බලවත් වන තරමට හෙට්ටු කිරීමේ අගය වැඩි වන බව හිරුණිකා ඉවෙන් මෙන් දැන සිටියාය.

Read More

හිරුණිකා,ඔබට යුක්තිය කෙසේවෙතත් රාජපක්ෂයානු ලංකාවේ යථාව සම්මුඛ වී ඇත

| සනත් බාලසූරිය

හිරුණිකා ප්‍රේමචන්ද්‍ර යනු අද්‍යතන දේශපාලන රඟම~ලෙහි දිදුළන ගිනිසිලූවකි. මෙයින් සත් මසකට පෙර දිනෙක හදිසියේ ඇය මෙසේ දිදුළන ගිනිසිලූවක් ලෙස පොලාපැන්නේ ඛේදවාචකයක ගිනියම මැදිණි. දේශපාලන ප්‍රචණ්ඩත්වය නිදන්ගත රෝගයක් වූ අපේ වැනි වැඩවසම් සමාජවල අතිබහුතරයක් ස්තී්‍රන් දේශපාලන - සමාජ තලයේ ගිනිසිලූ බවට පත්වන්නේ එවැනි ඛේදවාචක මැදින් වීමේ ඉරණම, ඒ අනුව ඇයටද පොදුවී තිබේ.

ලාංකේය දේශපාලන ගොහොරුවේ සේම මාධ්‍ය කවචයේද වඩාත්ම දිදුළන ගිනිසිළුවක් වීමට අවශ්‍ය ආකර්ෂණීය රුව පමණක් නොව, මාධ්‍යයේද, දේශපාලනයේද හොඳින් අලෙවි වන කටක්ද ඇය සතුය. මේ ගිනිසිළුව අලූ පොදක් හෝ ඉතිරි නොකරම වියැකීයාද, නැතිනම් තියුණු අවියකට පන්නරය දෙන අග්නි ප්‍රවාහයක් වේද යන්න ගැන වෛෂයික කරුණු විසින් පෙන්වන අනුමානයකට යාහැකි වුවත්, මේ ලිපියේ මුඛ්‍යාර්ථය එය නොවේ.

හිරුණිකාගේ අභිලාෂය වී ඇත්තේ සිය පියාගේ ඝාතනය අරබයා සාධාරණ අධිකරණ කි්‍රයාමාර්ගයකින් යුක්තිය ඉටුකරවාගැනීමය. එහෙත් අවසන් නඩුවාර කිහිපයකදීම මාධ්‍යයට අදහස් දැක්වූ හිරුණිකා කියා සිටියේ අධිකරණ කි්‍රයාමාර්ගයේ සාධාරණත්වය ගැන තමන්ට විශ්වාස නැති බවය. zශ්‍රී ලංකා එක්ස් නිවුස්Z වෙබ් අඩවිය හා දීර්ඝ සම්මුඛ සාකච්ඡාවක යෙදෙමින් ඇය පවසන්නේ, ඝාතනයේ ප්‍රධාන සැකකරු වියයුතු දුමින්ද සිල්වාද පසුගිය නඩුවාරයේදී මේ සිදුවීමේ අගතියට පත් පුද්ගලයකු බවට නම්කිරීමත් සමඟ, අධිකරණයෙන් තමන්ට සාධාරණයක් ඉටුවීම සැකසහිත බවයි.

යුක්තිය සොයන යෞවනිය

ඝාතනයවූ සිය පියා වෙනුවෙන් යුක්තිය සොයායන 24 හැවිරිදි යෞවනියක වූ හිරුණිකාට මේ සම්මුඛ වෙමින් තිඛෙන්නේ පශ්චාද් නන්දිකඩාල් යුගයේ රාජපක්ෂයානු ශ්‍රී ලංකාවේ යථාවයි. දෛවෝපගත ලෙස සිය පියාගේ ඝාතනය සිදුවූ විගසම, එනම් ඇය දේශපාලන රඟම~ලේ දිදුළන ගිනිසිළුවක් බවට ක්ෂණ දීප්තියක් ලත් විගසම, ඇයට මේ යථාව සම්මුඛ වීමේ ක්‍රියාදාමයද ආරම්භ විය. එතැන් පටන් ගතවන හැම නිමේශයක් පාසා ඒ යථාවේ තව තවත් අඳුරු අහුමුළු වෙත ඇය ක්‍රම ක්‍රමයෙන් නිරාවරණය වෙමින් සිටින්නීය.

යුක්තිය සොයායන ඇයට ඒ වෙනුවට හමුවන පශ්චාද් නන්දිකඩාල් යුගයේ රාජපක්ෂයානු ලංකාවේ යථාව කුමක්දැයි හඳුනාගැනීමට, හිරුණිකා නම් දීප්තිමත් ගිනිසිළුවම අපට ආලෝකය සපයයි. මෙහිද උත්ප්‍රාසයක් සැඟව ඇත. ඒ ආලෝකය සපයන හිරුණිකා නම් යෞවනියමත්, මේ මොහොතේ පවා, ඒ යථාව එහි සමස්තාර්ථයෙන් නොහඳුනන්නීය. එය හුදෙක් මෙයින් සත් මසකට ඉහත දිනයක් දක්වා සිය පියාත්, එතැන් පටන් තමනුත් පසුපස හඹා එන පුද්ගල නපුරුකමක් ලෙස පමණක් ඇය දකිමින් සිටින්නීය. ඒ ගැන අන්තර්ජාල අවකාශය ප්‍රමුඛ මාධ්‍ය කවචය ඔස්සේ ඇයට දරුණු විවේචන එල්ල වෙතත්, ලියුම්කරු ඈ දෙස දයාර්ද්‍රව බලමින් මේ ගැටලූව සලකා බැලීමට කැමැති වෙයි. (දයාර්ද්‍ර වීම වැනි ගුණාංග පෞද්ගලික මනුෂ්‍ය සබඳතාවන්හි දී තරමටම දේශපාලන ගනුදෙනුවේ දී වලංගු නොවන බැවින්, මේ ලියැවිල්ලද ඇය අරබයා යම් නිර්දය ඉසව්වක් කරා ගමන් කිරීමේ අනිවාර්ය අවදානම දරාසිටී)

භාරත නම් ප්‍රතිවීරයා

ඩී බී එස් ජෙයරාජ් වරක් විග්‍රහකළ පරිදි භාරත ලක්ෂ්මන් ප්‍රේමචන්ද්‍ර යනු ප්‍රතිවීරයෙකි. ඔහු සිය දේශපාලන ශාස්තෘවරයා කරගත් විජය කුමාරතුංගගේ කොන්ඩා මෝස්තරයත්, ඔහුගේ සිනමා ප්‍රතිරූපය වූ හිතහොඳ චණ්ඩියාගේ භූමිකාවත් තමන්ට අනන්‍ය කරගත්තෙකි. කොන්ඩා මෝස්තරය ඔහුගේ නලල මත කාල ප්‍රවාහය හා සටන් කරමින් රැඳී තිබුණත්, මෙය සිනමාව නොව තථ්‍ය ලොව වූ බැවින් හිතහොඳ චණ්ඩියාගේ චරිතය දේශපාලනයේදී සංකීර්ණ හැඩගැසීම්වලට ලක්විය. ඔහු නියෝජනය කළ නාගරික ප්‍රදේශ ගත්කල අඳුරු සමාජතීරුවල මුක්කුව පිටිපස්සෙන් නැතිව හිතහොඳ චණ්ඩියා චරිතයට ඇඳීම කළ නොහැක්කක් විය. මේ අඳුරු සමාජතීරුවල මුක්කුව පසුපස නීතිවිරෝධී අවිවලින් ශක්තිමත්වූ මැරබලය සේම අන්ධකාර ජාවාරම්වල ධනබලයද, ඒ සියල්ලට රැකවරණ සැපයූ දේශපාලන බලහත්කාරයද විය.

zzඅපේ තාත්තා අද ජනාධිපතිවරයා ඔතැනට ගේන්න හුඟක් මහන්සි වී වැඩකළ අයෙක්ZZයි හිරුණිකා කියන්නීය. (ශී්‍ර ලංකා එක්ස් නිවුස් සාකච්ඡාව) එය සැබෑවකි. මහින්ද වටා අද සිටින සියයට අනූ පහක් ඔහුගේ පැත්තවත් නොබැලු කාලයේ භාරත ඔහු පසුපස සිටියේය. හිරුණිකා රටතොට දැන හඳුනාගන්නා කාලය වනවිට, එවකට බොහෝ අවාසිදායක බල තරගයක් මැද අමාරුවෙන් ඔලූව ගහගෙන සිටි මහින්ද පසුපස සිය පියානන් සිටි අයුරු දකින්නට ඇත. නාමල් රාජපක්ෂ සම්බන්ධයෙන් ඉස්මත්තට ආ ඕපාදූප කතාවකදී හිරුණිකා මාධ්‍යයට කී දෙයින්මත් මේ පවුල් දෙක අතර වූ සමීප සම්බන්ධය පැහැදිළි වෙයි. මේ අතීත මතක වේදනාව ඇගේ ක්ෂතිමය අත්දැකීම තවත් භයංකර කරවයි.

එහෙත් මේ සමීප සබඳතාව මැද්දට බොහෝ අපල උපද්‍රව පසුකාලීනව කඩාවැටිණි. ඒ අතර වන පෞද්ගලික ඕපාදූප පසෙකට දැමූවිට, මේ සබඳතාව මැදට මෙයින් වසර පහක් තරම් මෑතක කඩාවැටුණු zහෙනහුරෙක්Z සිටියේය. ඒ භාරතගේ ගමෙන්ම ආ, තමන් විසින්ම සිරුරට ගිනිතබාගෙන දේශපාලන ගිනිසිළුවක් බවට පත්, සිය පවුල් ව්‍යාපාරයක් බේරාගැනීමේ එකම පරමාර්ථයෙන් ආණ්ඩුවට එක්වූ දුමින්ද සිල්වාය. භාරත ජනාධිපතිවරයා ඇසුරේ භුක්තිවිඳි සැලකුම් ගෙවී, ඔහුගේ රශ්මි කදම්භය කෙමෙන් නිවී යන්නටත් මේ නව සම්බන්ධය හේතුවූ බවට භාරතගේ අවසන් දේශපාලන කතාව පවා දෙස්දෙයි. මේ සබඳතා පළහිලව්වේ අතිශය වැදගත් කාර්යභාරයක්, දුමින්ද සිය සුරතලකු කරගත් ගෝඨාභය විසින් ඉටුකරන ලද බව ප්‍රකට කරුණකි.

තේ කෝප්පයෙන් විසඳිය හැකිවූ ප්‍රශ්නය

භාරත සහ දුමින්ද අතර මාරාන්තික විරසකයටද වසර කිහිපයක ඉතිහාසයක් විය. භාරතගේ අවසන් දේශපාලන කතා කිහිපයේ හරය දෙස බලනවිට මේ විරසකය ඔහු අර්ථ දක්වා තිබුණේ zකුඩු ජාවාරම්කාරයන් හා කුඩු ජාවාරමට එරෙහිවූවන් අතර සටනක්Z ලෙසටය. ඔහුට අනුව ගෝඨාභය පවා සිටියේ කුඩු ජාවාරම්කාරයන්ගේ පැත්තේය. දුමින්ද සිල්වා සහ මත්ද්‍රව්‍ය ජාවාරම් අතර සම්බන්ධයද මීගමු පැත්තේ වෙරළට ආ මත්කුඩු තොගයක් භාරගන්නට පැමිණ තිබූ දුමින්දට අයත් සුඛෝපභෝගී වාහනයක් පිළිබඳ පොලිස් පොතෙන් මැකුණු සාක්කියක් ඇතුළු තවත් සාක්කි ගොන්නකින් අධිකරණ කි්‍රයාදාමයකට පිටින් තහවුරු වූවකි.

Zzමේක තේ කෝප්පයකින් විසඳන්න තිබුණු ප්‍රශ්නයක්ZZ හිරුණිකා කියන්නීය. zzදෙන්නටම එන්න කියලා මේ මගේ පරණ මනුස්සයෙක් ප්‍රශ්න ඇතිකරගන්නෙ නැතිව වැරදි වැඩ නොකර පැත්තකට වෙලා ඉන්න කියලා දුමින්දට කියන්න තිබුණාZZ හිරුණිකාට මඟහැරෙන යථාවේ පළමු කොන ඇත්තේ එතැනය. පරණ හෝ අලූත් යාලූකම් මත පශ්චාද් නන්දිකඩාල් යුගයේ රාජපක්ෂයානු ලංකාවේ සංසිද්ධීන් තීරණය වන්නේ නැත. දශක දෙක තුනක් තිස්සේ භාරතට කරන්නට බැරිවූ වැඩ කටයුතු රාශියක් දුමින්ද අතින් මේ අවුරුදු පහට සිදුවී තිබිය යුතු බවත්, ඒවා කලූ සල්ලිවල සිට මිනිසුන් වාශ්ප කිරීම් දක්වා විය හැකි බවත් එළිදරව් වීමක් ගැන සිතන්නටවත් ලංකාව රාජපක්ෂයානු ග්‍රහණයෙන් මිදෙන කාලයක් එනතුරු බලා ඉන්නට සිදුවන ලකුණු පහළ වී අවසන්ය. ඊයේ පෙරේදා කරලියට ආ zද ෆිනෑන්ස්Z කොටස් ගනුදෙනුවේ දුමින්ද සොයුරු රේනර් සිල්වා ඉටුකළ කාර්ය භාරය පවා මේ අඳුරු සබඳතා හෙළිදරව් කිරීමට අනාගතය විසින් නිරාකරණය කළයුතු ගැටලූ ගොන්නට අයත්ය. භාරතලා දුක සේ දරදිය ඇද්ද සමයේ ඉටුකරවාගන්නට නොතිබූ බොහෝ අඳුරු අවශ්‍යතා අද යුද්ධය හමාරකළ රාජපක්ෂවරුන්ට ඇත. ඒවා ඉටුකරදීමට භාරතලාට වඩා සමත් අපූරු සර්කස්කාරයෝ රාජපක්ෂවරුන්ට මුණගැසී සිටිති. මේ එබඳු සර්කස්කාරයන්ගේ වාරයයි.

මේ සිද්ධියේදී මහින්ද ගෝඨාභය දෙපළගේ පක්ෂපාතීත්වය තිබුණේ කාවෙතදැයි මුල් අවස්ථාවේදීම මනාව පැහැදිළි විය. මහේස්ත්‍රාත් අධිකරණයට ඉදිරිපත් වූ භාරතගේ රියදුරා දුන් කටඋත්තරයෙන් කියැවුණේ දුමින්ද සිල්වා භාරතට වෙඩිතැබූ බවය. එහෙත් රාජපක්ෂ සොහොයුරෝ නීතියෙන් දුමින්දගේ රෝම කූපයකට හෝ හානියක් වන්නට නොතබා ඔහු රාජ්‍ය අනුග්‍රහය හා ආරක්ෂාව සහිතව රටින්ද පිටකළහ. මේ සියල්ල දන්නා රහස් පොලීසිය ඇතුළු යුක්තිය පසිඳලීම වෙනුවෙන් සිටින ආයතන දුමින්ද සිල්වා හා හොරා පොලිස් සෙල්ලමක නිරතව සිටී.

රාජපක්ෂවරුන්ගේ සුරතල්ලූ

විවිධ පාර්ශව වෙතින් මිනීමරුවන්, අපරාධකාරයන්, කප්පම්කාරයන්, මත්ද්‍රව්‍ය ජාවාරම්කාරයන්, මහජන දේපල මංකොල්ල කන්නන් ලෙස ප්‍රසිද්ධියේ චෝදනා ලබා සිටින අතිවිශාල පිරිසක් රාජපක්ෂවරුන්ගේ හොඳම සුරතල්ලූ වී සිටිති. ඔවුන් අදටත් වැරදිකරුවන් නොවී සිටින්නේ ඒ පිළිබඳ සාධාරණ හා අපක්ෂපාතී නීතිමය කි්‍රයාදාමයක් නොමැති බැවින් පමණක්ම විය හැකිය. ඉතාම සුළු උදාහරණයක් ගතහොත් ටෙලිකොම් ආයතනයේ පරණ යකඩ හොරකමකට හා ව්‍යාජ ලිපිලේඛන සෑදීමකට වරෙන්තු දෙකක් ලබාසිටින අයිටීඑන් ප්‍රධානියකු වන සුධර්මන් රදලියගොඩ නැමැත්තා මේ වරෙන්තු පිටම මාස දහයක් තිස්සේ ප්‍රසිද්ධියේ සැරිසරයි. රූපවාහිනියේ නිතිපතා පෙනීසිටී. zදේශප්‍රේමී මාධ්‍යවේදීන්Z නියෝජනය කරමින් මහපාරේ රඟයි. ඔහු නීතියෙන් බේරන එකම ඉන්ද්‍රජාලික බලය රාජපක්ෂවරුන්ගේ රැකවරණයයි.

සුදුවෑන් භීතිකාව නමින් ප්‍රසිද්ධ මිනිසුන් අනීතිකව අතුරුදහන් කරවීම රාජපක්ෂවරුන්ගේ වැඩක් බවට මේ වනවිට නොබිඳිය හැකි සාක්ෂි හමුවී ඇත. කොලොන්නාව නගරාධිපතිවරයා පැහැරගෙන යාමට තැත්කිරීම, ජීවන් කුමාරතුංගගේ මස්සිනා පැහැරගෙන යාම, මත්ද්‍රව්‍ය නඩුවක සැකකරුවකු ශ්‍රේෂ්ඨාධිකරණය ඉදිරියේ දී බන්ධනාගාර නියාමකයන්ගේ භාරයෙන් පැහැරගෙන යාම සේම කුමාර් දිමුතු දෙදෙනා පැහැරගෙන යාම විසින්ද නැවත නැවතත් ඔප්පු කර පෙන්වූයේ මේ පසුපස ඇති හස්තය කුමක්ද යන්නය. එහෙත් නීතිය ඒ දෙස ඇසක් ඇර බලන්නට සූදානම් නැත

විධායක ජනාධිපති ක්‍රමය ස්ථාපිත කළ දා පටන් එහි අසීමිත බලය නොයෙකුත් අකටයුතුකම් උදෙසා පාවිච්චි විය. ස්ත්‍රී දූෂණයකට හිරේගිය ගෝනවල සුනිල් නම් කුප්‍රකට චරිතය ජනාධිපති සමාව ලබන්නේ ෙජ්ආර් යුගයේදීය. පාතාල නායකයකු වූ සොත්ති උපාලි zඋපාලි ළමයාZ වී එජාප කෘත්‍යාධිකාරී මණ්ඩලය කරා කැඳවෙන්නේ ප්‍රේමදාස යුගයේදීය. බැද්දගාන සංජීව ජනාධිපති ආරක්ෂක ඒකකයේ හයියෙන් දේශපාලන විරුද්ධවාදීන් මර්දනය කරන්නේ චන්ද්‍රිකා යුගයේදීය. එහෙත් මේ හැම යුගයක්ම රාජපක්ෂ යුගයට දැනටමත් පරාදය. එය මහින්ද යුගයක් නොව පශ්චාද් නන්දිකඩාල් රාජපක්ෂ යුගයක් වන බැවිනි. එය අනාගතයටත් රාජපක්ෂ යුගයක් වන්නට නියමිත බැවිනි.

රාජපක්ෂයානු ලංකාවේ යථාව

රාජපක්ෂයානු ලංකාවේ යථාව තුළ ඔබ නිවැරැදි මිනිසකුද, වැරදිකාරයකුද යන වෛෂයික කරුණ තවදුරටත් වලංගු නැත. කුමන තරාතිරමේ අපරාධකාරයකු වුවත්, ඔබ සිටින්නේ රාජපක්ෂවරුන්ගේ පැත්තේ නම් ඔබේ රෝම කූපයකට හෝ හානියක් නැත. එහෙත් ඔබ සිටින්නේ රාජපක්ෂවරුන්ට අභියෝග කරන පැත්තේ නම් ඔබ නිවැරැදිකරුවකු වුව වැඩක් නැත. ඔබ දේශපාලනයට කිසිම සම්බන්ධයක් නැති රගර් කී්‍රඩයකයකු වුවත්, රාජපක්ෂවරුන්ට අභියෝග කරන්නේ නම් ඔබට වැඩ වරදින්නට නියමිතය.

මේ යථාව අවබෝධකරගත් පියසේන ගමගේ පුත්‍රයා මේ වසරේ ආවාහ කරගන්නට සිටි සිය පෙම්වතිය වූ හිරුණිකාට සමුදුන්ණේය. මේ යථාව හුදෙකලා සිද්ධියක් ලෙස ගෙන කැරලි ගසන ආකර්ෂණීය කැරලිකාරිනියක හා ත්‍රාසය අත්විඳීම වෙනුවට ඔහු ඒ සමස්ථ යථාවට අනුගත වී සිය පියා සේම කරබාගෙන ඉන්නා තීන්දුවට පසුබැස්සේය. ඇගේම මව ජනාධිපතිවරයා විසින් සහනාධාර සලාකයක් සේ ලබාදුන් තනතුරකින් සෑහී ආණ්ඩුවේ නිල නිවසත් වාහනයත් තව ටික කාලයකට හෝ සිය දරුපවුල වෙත තබාගත්තාය. පසුගිය මැයිදින පෙළපාලියේ දී හිරුණිකා දක්වන්නට ගිය සංඛේත විරෝධතාව මේ ස්වයංකී්‍රය බොත්තම එබීමෙන් රාජපක්ෂවරු නවතා දැමූහzයි මාධ්‍යවල වාර්තා විය. ශ්‍රී ලංකා මහජන පක්ෂය නම් හුළං ගිය තුන්රෝද රියේ සුක්කානම පේන දුරින් ලැබී ඇති ආසනය ඇගේ තුරුණු ජවයෙන් පිරි අවංක රැඩිකල් කතාවලට ගැලපෙන්නේ, රොකට්ටුවක් ඇදගෙන හඳට යන්නට යෙදූ බූරුවකුගේ සුසංයෝගයේ ගැලපුමට අනුවය.

හිරුණිකා, කණගාටුවෙන් වුවද කීමට ඇත්තේ ඔබට යුක්තිය හෝ එහි ඡායා මාත්‍රයක් හෝ හමුවේදැZයි විශ්වාසයක් තබාගන්නට තරම්වන වාස්තවික හේතු මා අත නොමැති බවයි. එහෙත් ඔබට පශ්චාද් නන්දිකඩාල් යුගයේ රාජපක්ෂයානු ලංකාවේ යථාව නම්, ඔබේ පියා ඝාතනය වූ මොහොතේ පටන් සම්මුඛ වී තිබේ. එය සමස්තාර්ථයෙන් හඳුනාගන්නවාද නැද්ද යන්න ඔබේ සටනේ අනාගතය තීරණය කරන පළමු සාධකය වනුඇත.

Read More

මගේ ආදර තාත්තේ...

| හිරුණිකා ප්‍රේමචන්ද්‍ර

( 28.01.2012 | lankaguardian.com ) සිහිනෙකින් වත් නොසිතූ මේ හදිසි සමු ගැන්මේ වේදනාව මට දරා ගත නොහැකිය. කම්පිත හදවතේ පවත්නා ශෝකයේ තරම වචන බවට පෙරලිය ද නොහැකිය. අද මා අත්විඳිsන්නා වූ ශෝකය එතරම්ම ගැඹුරුය. කල්යත්ම මේ වේදනාව, පාළුව සෙමින් පහව යතැයි කියමින් සියල්ලෝ මා අස්‌වැසුව ද ගෙවෙන සෑම තත්පරයක්‌ පාසාම මට මාගේ තාත්තා සිහිවේ. බලන හැම අත මට පෙනෙන්නේ සිනහ පිරුණු මුවින්, ආදරය උතුරා යන දෑසින් මා දෙස බලා හිඳින මගේ තාත්තාගේ රුවයි. පුංචිම පුංචි දේකට හිත රිදුනු හිත බිදුණු විගස මා දිව ගියේ මාගේ තාත්තා ළඟටයි. හිස අත ගා සැනසුම් වදන් කී මගේ තාත්තාගේ උණුසුමේ මගේ පුංචි හිත හැමදාමත් නැළවුණි, සැනසුණි, නිවුණිs. මේ තරම් හිත රිදුණු වෙලාවක හිත බිදුණු වෙලාවක මට මගේ තාත්තා කොතරම් උවමනා දැයි මට ඔබට තේරුම් කර දිය නොහැක. මේ සමු ගෙන ඇත්තේ භාරත ලක්‍ෂමන් ප්‍රේමචන්ද්‍ර නම් ජනතා නායකයාය, දේශපාලඥයාය, වෘත්තීය සමිති නායකයාය යන්න මට මදකට හෝ අමතක කළ හැකිය. එහෙත් මේ සමු ගෙන ඇත්තේ මගේම ආදරණීය තාත්තා බව මම කෙසේ අමතක කරන්නද?

කම්පිත, සලිත මසිතේa මැවෙන මතක අතරේ අන් කවරදාටත් වඩා විසල්ව මට මගේ ගාම්භීර තාත්තාගේ රුව පෙනේ. එදා මේ තරම්ම ගැඹුරු යෑයි නොසිතුණු මගේ තාත්තාගේ හඬ අන් කවරදාටත් වඩා පැහැදිලිව දැන් මට ඇසේ. එදා ගතින් මගේ තාත්තා වැළඳ ගත් මම අද සිතින් දස දහස්‌ වාරයක්‌ ඔහු වැළඳ ගමි. ඔහුගේ ගුණ සුවඳ සොයා යමි.

කාර්යබහුල මගේ තාත්තාට මම අනේක වර නෝක්‌කාඩු කියා ඇත්තෙමි. මට තාත්තා අවශ්‍යම මොහොතක ඔහු මා ළඟ නොවිණි නම් ඔහු මාත්, මල්ලීත්, අම්මාත් දෙවැනි කොට ඇති බැව් ඔහුට කියා ඇත්තෙමි. හැමදාමත් පළමු තැන පිටස්‌තර මිනිසුන්ට දී ඇති බැව් කියා ඇත්තෙමි. මගේ තාත්තා අප වෙනුවෙන් පමණක්‌ නොව මුළු ලෝකයාම වෙනුවෙන් කැපවන්නට ඇත්තේ මහා මිනිසත්කමෙනි. එදා හිත රිදුණු වෙලාවක මා කියූ නෝක්‌කාඩු නිශ්ශබ්දව එහෙත් සන්සුන්ව සිනහ පිරි මුවින් අසා සිටි තාත්තා මා ඉදිරියේ මැවී පෙනේ. සුවහසක්‌ මිනිසුන් වෙනුවෙන් කළ කැප කිරීම් ගත් වෙහෙස අපට කියා දුන් මහා පාඩමක්‌ බව කෙදිනකවත් වචන නොකලේ ඇයි දැයි තාත්තාගෙන් අසන්නට දැන් මට සිතේ. එදා පුංචි මා නොදැන කළ වරද වරදක්‌ සේ මගේ තාත්තා කිසිදා නොසිතූ බව මම දනිමි. එහෙත්, දෙපා මුල දණින් වැටී ඔබ මිනිසත් බව වෙනුවෙන් සියලු යුතුකම්, වගකීම් නොපිරිහෙලා ඉටු කළ කාර්යබහුල මහා මිනිසෙකු බව මට මහා හඬින් කියන්නට උවමනාය.

මගේ යෙහෙළියන් කවදත් මා හැඳින්වූයේ වාසනාවන්ත දියණියක ලෙසයි. මගේ තාත්තා වැන්නකු ලැබීමට පෙර පින්කොට තිබිය යුතු බව ඔවුනගේ අදහස විය. ඔවුන්ගේ කතාවෙහි ගැඹුර මට හරි හැටි දැනෙන්නේ දැන්ය. ඔහු වැනි සෙනෙහෙබර පියෙකු ලද මා සැබවින්ම භාග්‍යවන්ත දියණියකි. මගේ තාත්තා මට විසල් රැකකි. ඔහු හිරු එළිය ද, සඳ එළිය ද පෙරා දුන් පියෙකි. විසල් තුරු සෙවනේ ආරක්‍ෂාව මැද නිදහසේ සැරිසරන්නට, මහා ගැඹුරට හිතන්නට කියා දුන් පියෙකි. අද තනිව ඇත්තේ විසල් රුක පාමුල හැදි ඒ පුංචි පැළයයි. අව් වැසිවලට පමණක්‌ නොව කුණාටුවලටද මා අද නිරාවරණය. එහෙත්, සියල්ල මධ්‍යයේ සන්සුන්ව, ශක්‌තිමත් ව සිටිනා සැටි මගේ තාත්තා මට කියාදී ඇත. මගේ පියාව මගෙන් උදුරා ගත්ත ද, කිසිවෙකුටත් මගෙන් උදුරා ගත නොහැකි බොහෝ දේ ඔහු මට තිළිණ කොට ඇත.

ජීවිතය ගැඹුරින් දකින්නට අවැසි නුවණැස ඔහු මට ලබා දුණි. නීතිය හැදෑරීමට මා යොමු කලේ මගේ පියාය. මා නීතිඥවරියක සේ අපරාධ නඩුවක්‌ කතා කරනු දැකීම මගේ පියාගේ සිහිනයක්‌ විය. එහෙත් මාගේ දැනීම පළමුව ඔහු වෙනුවෙන් සාධාරණය ඉටු කිරීම සඳහා යෙදවීමට සිදු වනු ඇතැයි මගේ පියා සිහිනෙනකින් වත් නොසිතන්නට ඇත. මේ දුෂ්කර පරිසරයේත් අසීරුවෙන් හදා ගත් සිතින් මම පියාගේ සිහිනය සැබෑ කරන්නට කැප වී සිටිමි.

මගේ පියා පිළිබඳ මතක අතරේ මට කිසිදා අමතක නොවන යමක්‌ ඇත. මගේ නිවස හැම විටම මිනිසුන්ගෙන් පිරී ගිය එකකි. මේ සෑම මිනිසෙකුටම මගේ පියා ලකී අයියා විය. ඒ සෑම මිනිසෙකුම මගේ පියාගේ සහෝදරයකු විය. මගේ පියා මේ සියලු දෙනා ඇමතුවේ ළෙන්ගතු ලෙසිනි. දිනක්‌ මම තාත්තා සමඟ ඉතා සමීපව කටයුතු කළ මාමා කෙනෙකුට ඔහුගේ නම කියා ඇමතීමි. මගේ පියා එතරම් මා හා කිපුණු දිනක්‌ මට මතක්‌ කර ගත නොහැකිය. ඔහු සැර පරුෂ පියකු නොවීය. එහෙත්, එදා මට කියා දුන්නේ ජීවිතයේ මහා වටිනා පාඩමකි. මගේ පියා වියෝ වී තෙමසක්‌ ගත වී තිබුණත් ඔහුව අමතක නොකළ, අප හැර නොගිය දයාබර මිනිසුන් මගේ පියා මට ඉතිරි කොට ඇත. මිනිසුන් හා ළෙන්ගතුව ඔවුන් හා දුක සැප බෙදා ගන්නේ කෙසේ දැයි මගේ තාත්තා මට උගන්වා ඇත. අප හා සමීප, ළෙන්ගතු අප ආරක්‍ෂා කරමින් ළඟ රැඳෙන, මිනිසුන් දකින විට ඔබ අප හැර ගියත් අප හැර නොයන මහා මිනිස්‌ පවුරක්‌ අප වෙනුවෙන් තනා ඇති බැව් මට සිතේ. පිය උරුමයෙන් මට ලැබී ඇත්තේ නිර්ලෝභීව සහෝදරත්වයෙන් ජීවිතය බෙදා හදා ගන්නා මිනිසුන්ය. තාත්තේ, ඔබ මෙන් ම මම ද ඔවුන් හා බැඳෙමි. සැම විට ඔවුන් සහෝදරත්වයෙන් රකිමි. ඔවුනට පිටු නොපාමි. මට මගේ තාත්තා වෙනුවෙන් ඔවුනට දිය හැකි උසස්‌ම දේ එය යෑයි මට හැඟිමි.

තාත්තා කොතරම් සොඳුරු සරල මිනිසකු දැයි සිහි ගන්වන තවත් සිදුවීමක්‌ මගේ සිහියට නැඟේ. ගෙදරින් බැහැරට යාමට හැද පැළඳ ගෙන සිටි මම ඉරී දුර්වර්ණ වී තිබුණු මගේ පාවහන් යුගලය පරණ එකක්‌ යෑයි මැසිවිලි කීමි. මට අලුත් පාවහන් යුගලක්‌ අවශ්‍ය යෑයි කීමි. මගේ තාත්තා මේ කිසිවක්‌ නෑසුනු ලෙසින් පුටුවට බර වී ඔහු හමුවීමට ආ මාමලා සමඟ කතා කරමින් සිටි හැටි මට මතකය. මම තාත්තා සමීපයට ගොස්‌ අලුත් පාවහන් යුගලයක්‌ ගැනීමට මුදල් ඉල්ලීමි. "සෙරෙප්පු දෙක පරණ වුණාට මගේ දූගේ අගේ අඩු වෙන්නේ නැහැ, කවුරුත් මගේ දුව සෙරෙප්පු දෙකෙන් මනින්නේ නැහැ. ඕක ගණන් ගන්න එපා, ආ ඔයාට ඕනේ දැන් දාගෙන යන්න සෙරප්පු දෙකක්‌ නම් මේක දාගෙන යන්නැයි කියමින් ඔහු මට ඔහුගේ පාවහන් යුගල පෙන්වූ හැටි මට අද මෙන් මතකය. ගාම්භීර මගේ පියා තුළ වූ ඒ සරලකම සොඳුරු කම අද මම සිහිකරමි. ඔහු මට දමා ගෙන යන්නැයි කී ඒ පාවහන් යුගලය මගේ තාත්තාගේ ගතින් ගලා ගිය රුධිරය මැද වැටී තිබෙන අයුරු රූපවාහිනියෙන් දකින කළ මා සිත කෙතරම් රිදෙනවාදැයි මට ඔබට විස්‌තර කල නොහැකිය. එය දකින වාරයක්‌ පාසා ඒ පාවහන් යුගල පැළඳ සුදෝ සුදු ජාතික ඇඳුම හැද විහිලු තහලු කරමින් සිටි මගේ තාත්තා මට මැවී පෙනේ. මට නිවැරදි දිශාව කියා දුන් දිශා දර්ශකය මගේ පියාය. මට පාර කියු පහන් තාරකාව මගේ පියාය. අපේ ජීවිත එළිය කල පහන් වැට ඔහුය. නමුත්, මගේ සොඳුරු දයාබර ගාම්භීර තාත්තා අද මට අහිමිය. පෙර මා සිතා සිටියේ ඔහු මගේ ජීවිතයේ වටිනාම කොටසක්‌ කියාය. එහෙත් මගේ මුළු ජීවිතය ම ඔහු බව මට වැටහෙන්නේ දැන්ය.

කිසිඳු දුකක්‌ උහුලන්නට අපට ඉඩ නොදුන් මගේ යෝධ තාත්තා මාත්, මල්ලීත්, අම්මාත් ඔහු නොමැති සොවින් දැවෙන තරම්, තැවෙන තරම් දන්නේ නම්... වදන් බවට පෙරළිය නොහැකි ගැනිය නොහැකි, මිනිය නොහැකි මේ වේදනාවේ කටුකත්වය දන්නේ එය අත්විඳින අප පමණි. මෙලොව වසන කිසිම දියණියකට මෙවන් ඉරණමකට මුහුණ දීමට සිදු නොවේවායි මම සැමවිටම පතමි. අද මගේ තාත්තාගේ පනස්‌ හය වැනි ජන්ම දිනයයි. වෙන කවරදාටත් වඩා අද ඔහු මට සිහි වේ. එදා වගේම තාත්තා තුරුලු කොට ගෙන ඔහුට සුභ පතන්නට මට සිතේ. මගේ ගාම්භීර, අභිමානනීය, දයාබර තාත්තාට - තාත්තාගේ මතකයට මට සමුදිය නොහැක. මා දකින හැම සිහිනයකම මම ඔහු දකින්නට පතමි. උපදින හැම ආත්මයකම මම මගේ පින්බර තාත්තාම පතමි. මගේ තාත්තාට නිර්වාණයේ සුව හිමි වේවා!

Read More